Совет Союзӗн 2 хут Геройӗ, авиаци генерал-майорӗ Андриян Николаев ҫуралнӑранпа 95 ҫул ҫитрӗ. Чӑваш кӑйкӑрне халалласа ҫак куна Аслӑ Елчӗкри Г.Н.Волков ячӗллӗ пӗтӗмӗшле пӗлÿ паракан вӑтам шкулта та кашни класрах калаҫу сехечӗсем ирттерчӗҫ. Шкулти вулавӑшра вара ачасем ҫак пӗлтерӗшлӗ пулӑма палӑртса "Мухтавлӑ ентешӗмӗр  асран тухмӗ" ятлӑ куравпа паллашма пултарчӗҫ. 

    Вулавӑшра чи паха тупра пек упранакан хаҫат-журналсенче чӑваш ҫӗрӗн мухтавлӑ ывӑлӗ пирки чылай ҫӗннине пӗлме пулать. Вулавӑш ертÿҫи Любовь Адюкова Николай Овчинников Андриян Николаева сӑнланӑ "Здравствуй, Земля!" паллӑ картинипе тата ентешӗмӗр пирки ӳкернӗ документлӑ фильмпе паллаштарчӗ. Кураври кашни ӗҫе тимлӗн сӑнанӑран тата ятарласа хатӗрленӗ ыйту-хурав тест ыйтӑвӗсене хавӑрттӑн хуравланӑран  ачасем космоспа  тата та ытларах ҫывӑхланма пултарчӗҫ.

     Пирӗн ентешӗмӗр чӑваш нацине  чӑннипех чапа кӑларнипе эпир мухтанатпӑр.