Ҫуллахи каникул кунӗсем сисӗнмесӗрех иртсе пыраҫҫӗ. Халӗ анчах ҫӗртме уйӑхӗн пӗрремӗш кунӗ ҫитнӗччӗ, акӑ ӗнтӗ ҫурла уйӑхӗ те ҫитсе тӑчӗ. Тус-юлташсемпе ялан пӗрле пулнӑран-ши ҫак кунсем иртни  пӗрре те сисӗнмест. Ҫапла ҫав вӑл лайӑх юлташпа канма та уҫӑ сывлӑшра ӗҫлеме те аван!

     Ҫак кунсенче Аслӑ Елчӗкри Г.Н.Волков ячӗллӗ пӗтӗмӗшле пӗлÿ паракан вӑтам шкулти  7 класс ачисем практика кунӗсене ирттереҫҫӗ. Шкул вӑл - пирӗн иккӗмӗш кил. Кунта та яланах илем хуҫалантӑр тесен тӗрлӗ ӗҫ тумалла:  чечексене вӑхӑтлӑ шӑвармалла, киввисене касмалла, йӑрансене ҫум курӑкран тасатмалла. Ҫак ӗҫсене вӑхӑтлӑ тунӑран  пирӗн шкул лаптӑкӗ кунран-кун илемленсе ҫеҫ пырать, хӑй патне туртать. Кунта темӗн тӗрлӗ чечек те пур. Илемӗ куҫа илӗртет, шӑрши аякка сарӑлать. Иртен-ҫÿрене ырӑ кӑмӑл парнелет.

    Вӗренме ҫеҫ мар, пӗрле ӗҫлеме те питӗ аван. Усӑллӑ иртет пирӗн каникул, тунсӑхлама пачах та вӑхӑт ҫук!