Авăн уйăхĕн пĕрремĕш эрнинче кашни шкултах хăюлăхпа сывлăх урокĕсем иртеççĕ. Аслă Елчĕкри Г.Н.Волков ячĕлĕ пĕтĕмĕшле пĕлÿ паракан вăтам шкулта та ҫак эрнене паттăрсене халалланă.

   Пиллĕкмĕш класс ертÿҫи Любовь Адюкова вĕрентекен те паянхи пĕрремĕш урока «Паттăрлăх урокĕ» ятпа ирттерчĕ. Ҫак уçă урокра Тăван çĕршывăн Аслă вăрçин хаярлăхĕ, совет салтакĕсен паттăрлăхĕ, Чăваш Енĕн мухтавлă ывăл-хĕрĕ пирки те каласа пачĕ  Ҫитес çул Сăрпа Хусан хÿтĕлев чиккисене тунăранпа 80 çул çитет. Класс ертÿҫи ҫак пĕлтерĕшлĕ пулăма та тимлĕхсĕр хăвармарĕ. Вăрçă тапрансан тăватă уйăхран чавма пуçланă ăна. Виçĕ уйăхра тыл ĕçченĕсем 380 çухрăм окоп алтса хӳтĕлев чикки тунă. Унта 200 пин çын таран ĕçленĕ. Кашни çын пĕрер кубометр çурă таран çĕр кăларма пултарнă. Сăр чикки пирки хатĕрленĕ презентацие курнă хыҫăн ачасем кăсăкланса калаçăва тата та ытларах хутшăнса нумай ҫĕнĕлĕх пĕлме пултарчĕҫ. «Паттăрлăх урокĕ» пиллĕкмĕшсен асĕнче нумайлăха асра юлĕ.