Елчӗк районӗнчи Аслӑ Елчӗкри Г.Н.Волков ячӗллӗ вӑтам шкулта кӑҫал пуҫласа шкула килнӗ ачасемпе  «Эп вĕрентĕм вулама» пултарулӑх сехечӗ иртрӗ.

1-мĕш класра вĕренекенсем, 23 шăпăрлан, пысăк куçĕсене мăчлаттарса хăтлă та çутă шкул вулавăшне  çитсе тăчĕç. Класс ертуçи Т.Н.Ласточкина  ертсе пынипе паян вĕсем ятарласа çак кĕнекесен пулĕмне килчĕç. Мал ĕмĕтлĕ ачасене вулавăш ертуçи Л.Г.Адюкова ăшă кăмăлпа кĕтсе илнĕ май çулĕксем çинче тирпейлĕ вырăнаçтарнă кĕнекесемпе паллаштарчĕ, вĕсене тирпейлĕ тытмалли правилăсене те асǎнса хăварчĕ.

     Капӑр чӑваш тумӗ тӑхӑннӑ ачасем  ытарлă ыйтусем ҫине пӗрин хыҫҫӑн тепри тупӑшсах хуравларӗҫ, сăвăсем  каларĕç,  илемлĕ юрă шăрантарчĕç.

     Ачасем вулама пӗлнине шута илсе, вулавӑш ертӳҫи Любовь Германовна вӗсене вулакансен ретне илнине пӗлтерчӗ те формулярсем уҫса пӗрремӗш кӗнеке илме сӗнчӗ.

     Уяв пурин кăмăлне те тивĕçтерчĕ.