2016 çулхи нарăс уйăхěн 14-мěшěнче Аслă Елчěкре иртнě массăллă чупу тěрлě ÿсěмри чылай йěлтěçе старта йыхравларě. Сывă пурнăç йěркине мала хуракансене Аслă Елчěк ял тăрăхěн пуçлăхě Валерий Афанасьев, шкул директорě Николай Малышкин саламларěç.

Пысăк йышлă чупăва чи пěчěккисем – «Берёзка» ача садне çÿрекенсем тата 1-2 классенче вěренекенсем  уçрěç. Ашшě-амăшěсен хавхаланăвěпе çунатланнăскерсем, 43 йěлтěрçě те мала тухассишěн ăнтăлчě. Чи вăр-варрисем вара финиша пěрремěш çитрěç: вěсем – Диана Афанасьева тата Данил Патшин. Ытти ушкăнсенче Яна Афонина, Олег Ефимов, Александра Печкова, Александр Чернов, Дария Мохова, Максим Афанасьев, Людмила Амасева, Владислав Мисяков палăрчěç.

Призлă вырăна йышăннă кашни йěлтěрçе дипломсемпе, кěнекесемпе чысларěç. Хаваслă юрă-кěвě те, вěри чейпе тутлă икерчě те уяв пěлтерěшне ÿстерчěç, кăмăл-туйăма çěклерěç.