Ака уйăхĕн 25-мĕшĕ - Чăваш чĕлхи кунĕ. Кăçалхи уява пирĕн Аслă вĕрентекенĕмĕр И.Я.Яковлев çурални 165 çул çитнине халалласа ирттертĕмĕр. Çак кун  эпир,  Адюкова Юлия,Падуева Виолетта, Обручкова Анна тата Адюкова Л.Г.вěрентекен И.Я.Яковлев çуралнă ялта – Кăнна Кушкинче экскурсире пултăмăр.

Çавра çăкăрпа, сар сăрапа, юрă-ташăпа кĕтсе илчĕç пире Кăнна Кушкинче. Малтанах И.Я.Яковлев палăкĕ умĕнче митинг иртрĕ. Л.Кураков академик,  В.Туркай сăвăç тата ытти паллă çынсем И.Я.Яковлев чăваш халăхне çутта кăларассишĕн ырми-канми  тăрăшнине палăртса хăварчĕç. Хăйĕн мăн аслашшĕне чыслама Мускавран И.Я.Яковлев мăнукĕн мăнукĕ Л.М.Ордынская килнĕ.

Митинг хыççăн вăтам шкулпа, И.Я.Яковлев музейĕпе паллашрăмăр. Ун хыççăн пире ял курма экскурсие илсе кайрĕç.

И.Я.Яковлев çуралса ÿснĕ çурт вырăнĕнчи часовньăна çĕнетесшĕн кăннакушкисем. Хамăр тăхăмсем вали çырнă çырăва капсула ăшне хурса часовня никĕсне хучĕç. Çак вырăнтанах «Кăнна Кушки-Шупашкар Купăрля» чупу старт илчĕ. Ыттисемпе пĕрле эпир те спортсменсене ăнăçу сунтăмăр.

Киле тулли кăмăлпа таврăнтăмăр.